Олон сар жил өнгөрчээ. Маш ч хурдан урсах юм. Эдгээр олон сар жилүүдэд би зоолттой гэж бодсон нэг л зүйлдээ өөрийнхөө бүх зүйлийг зориулчихсан юм лдаа. Тэр нь хорвоод хосгүй хайр байв. Үнэхээр хорвоод хосгүй гэж бодсон юм шүү. Бидний эгэлгүй нандин холбоо энэ орчлонгийн амьдралаа туулж дуусаад ч түүнээс цааш хамтдаа байгаад л байна гэж итгэсэн байсан. Хамтын бүтээсэн амьдралдаа машид нүүр бардам байж, өөр юугаар ч солихгүй гэж итгэн өөрийнхөө зовлонг би нэгэнт сонгочихсон байсан юмсан. Тэр ганц л зүйлийг тойроод миний бусад хэсгүүд өрнөж байв. Гэтэл яг одоо бол тэр нэг зүйл нь бүтэлгүйтээд замхран одсон. Түүнийг дахин дуурайж босгоё гээд оролдовч хорвоод хосгүй хайраа хувилна гэж хаа байх вэ дээ. Чинадын цаадах утга учир, эрхэмсэг оршихуйгаа алдаагүй ээ. Энэ хорвоо дээрх утга учраа алдчихсан юм аа.
Энэ цаг үед төрсөн байгаадаа сэтгэл ханамжтай, ирээдүйд сониучирхаж байна. Орчин цагийн Монголчууд халгааж, бултаж, тойрч хулчийж явсаар өдийд ирсэн олон эмзэг сэдвүүдтэйгээ ойрын 20 жилд маш ихээр нүүр тулах нь баараггүй болов бололтой. Дотор нь хөндий биш хэд нь хувь хүнийхээ түвшинд өөрийнхөө хариултыг олох гэж оролдож, дотоод зөрчлүүд их өрнөх байх даа. Хөндий нөхдүүд ч яахав хаана хэн чанга лайв хийснийг л дагаж, тэдний амнаас гарсан үгсийг л цээжилж, давтаж ярьна шүү дээ. Эргэцүүлэх тэнхэлгүй учраас. Шашин, бэлгийн болон хүйсийн чиг баримжаа, улс төрийн үзэл санаа, гэр бүлийн харилцааны хэм хэмжээ гэх мэт алтан дунджыг барьдаг мэт царайлан аргацааж, цаг хожих боломжгүй сэдвүүд бий шүү дээ... Аргацааж цаг хожих гэж оролдох хооронд амьдрал чинь өрнөөд байх учраас шийдвэр гаргаж, түүнийхээ дагуу үйлдэл хийх шаардлага үүснэ лдээ. Ирээдүйн тэр өдрүүдэд юу өрнөх бол, хэн аль талд харьяалагдах бол, хэнээс тангараг тасрах бол? бас оронд нь хэнтэй шинээр учрах бол? Үнэхээр 0+0+...